Минме?! Мин…

– Мин өйгә генә кереп чыгыйм әле, – диде Нәфисә, серле күзләре белән кунак кызына карап. – Озак тормам. Син, Фәрит, сугыш чукмары, Айсылуны сакла, яме! Мин хәзер чыгып җитәм. Боектырма кунак кызын!

Нәфисә, күбәләк кебек кенә очып-йөгереп, өйләренә кереп китте. Айсылу белән Фәрит капка төбендә көнбагыш чиртеп утырып калдылар.

Тынлыкны Айсылу бозды.

– Фәрит, – дип эндәште ул ягымлы тавыш белән, – мин сине, беренче күргәндә, әйбәт малай дип уйлаган идем, әллә чынлап та сугышасың инде?

Малайның күзләрендә очкын ялтырап китте:

– Һа! Шту син! Пака мине җиңә алган малай юк әле мәктәптә. Миннән бит унынчының «телефон баганалары» да шүрли. Үзебезнең җиденчеләрне әйтеп тә тормыйм инде…

– Фәрит, – диде Айсылу, оялчан тавыш белән аны бүлдереп, – Фәрит… иртәгә клубтан чыккач, мине озатырсыңмы?

– Минме? – Малай башта аптырап калды, аннары автоматтан аткан шикелле тезеп китте. – Пажалысты! Кичә клубтан кайтканда, Әкрам белән бәйләнештек. Малай, ямадым тегенең күз төбенә!

– Фәрит, әгәр… әгәр миңа тия башласалар, син мине якларсыңмы? – Кыз күзләрен аска төбәде.

Бу вакытта малайга әллә нәрсә булган иде.

– Минме?! Минме… – дип әсәренде ул, урамның аргы башыннан чайкала-чайкала килүче бер абзыйдан күзен алмыйча.

Айсылу башын күтәрмичә генә янә эндәште:

– Фәрит, дим… Әйт инде, яклар идеңме? Әйт инде… – Шунда гына ул капка төбендә берүзе генә утырып калуын абайлап алды. – Әбәү, әле генә монда идең ич, кая юкка чыктың? Фәрит, дим, Фәри-и-и-ит!

Рәхмәт яусын Марсельгә!

Озын тәнәфестә тугызынчы сыйныф малайлары Айратны уратып алды, һәм төрле яклап киңәшләр ява башлады:

– Син бер дә оялып торма.

– Ие, кыюрак бул!

– Каушап калма.

Айрат исә, күзләрен бер ноктага төбәгән килеш, моңсу гына авыр сулап куйды:

– Белмим инде… аны күргәннән бирле юньләп йоклаганым да юк…

Ә-ә-ә… Сүз шәһәрдән Каенлыга, ягъни Айратлар авылына кунакка кайткан кыз – Нәзирә турында бара икән. Шул чагында сыйныф бүлмәсенә унберенче сыйныфтагы шадра Марсель килеп керде.

– Давай, ал кәгазь-ручка, – диде ул, хәлне аңлап алгач, – тәртип белән генә язып бар, өйрәтәм хәзер кызлар белән ничек сөйләшергә икәнен.

Бу өлкәдә Марсельнең тәҗрибәсе зур – бер ай эчендә ул тугыз кыз белән дуслашырга өлгергән, шуңа күрә һәркем, кызыксынып, колакларын торгызды.

– Клубта аның, ну… Нәзирәнең янына барып утыр. Кесәләреңә көнбагыш тутырып алып кил һәм тәмле исләрен чыгарып, перәме шунда ашарга тотын. Җыен юк-барны такылда. Берзаман ул синнән көнбагыш сорар. Син аңа: «Шундый матур кызлар сораганда тыңламый булмас инде», – дип, көнбагыш бирәсең. Учына салганда, мул итеп тондыр – идәнгә коелсын. Ул сиңа: «Абау, әрәм итәсең», – дияр. Син аңа: «Шундый матур кызларга берни жәл түгел», – диярсең. Исемен сорашкан бул, минем дә Нәбирә исемле сеңлем бар, дигән бул…

– Нәбирә түгел, Нәзирә, – дип бүлдерде Айрат.

– Анысы неважно, романнардагы кебек кыланма, клубтан чыккач, просто гына: «Минем дә сезнең урамга барып киләсем бар әле», – диген. Тә-ә-к… Кайтырга чыккач, башта авыл хәлләрен сөйлә, аннары мәктәпкә күч, йолдызларны да онытып бетермә. Шәһәр турында сораштыр: «Бер барып күрәсе иде шуны», – дигән бул. Менә күрерсең, аннан соң автоматически сайрый башлаячаксың… Саубуллашканда, «тот мужиклар кулын!» диген…

«Яшәсен Марсель!» – дип кычкырды тугызлар. Айрат әле генә язган кәгазен кесәсенә шудырды. Дәрескә чакырып, кыңгырау тавышы ишетелде.

…Клубта кино бара, зал бер яктыра, бер караңгылана. Арткы рәтләрнең берсендә иптәш кызы белән Нәзирә утыра, алардан да артта, тәрәзә төбендә исә Айрат шарт та шорт көнбагыш яра. Менә ул берзаман борчак сибә башлады:

– Теге бандитны күптән атып үтерергә кирәк иде, җебегәннәр! Рәзе шуның ише кино була. Теге апасын гына күр инде, тфү, оятсыз!

Кызлар аңа борылмыйча түзә алмады.

– Үскәнем, – диде Нәзирә, елмаеп, – семечкаңны читкәрәк китеп аша әле, фильм карарга комачаулыйсың.

– Шу-шундый матур кыз сораганда тыңламый булмас инде, – дип бытылдады Айрат, Марсельнең өйрәткәннәрен исенә төшерергә тырышып. Бу минутларда ул җир тишегенә төшеп китәргә дә әзер иде, каушавыннан көнбагышын идәнгә койды.

– Чүпләмә идәнне! – диде Нәзирәнең иптәш кызы.

– Шу-шундый матур кызларга берни дә жәлке түгел. – Малай инде нәрсә сөйләгәнен үзе дә аңламый иде.

– Да-а! – диде тегесе, бармагын чигәсе турысында боргалап.

– Ә… ә… синең исемең ничек? – дип сорады Айрат Нәзирәдән, көчкә телен әйләндереп.

– Мартышка!

– Ми-минем дә Мартышка исемле сеңлем бар… э-э…

Тфү, нәрсә сөйлим соң мин, дип уйлады малай эченнән генә. Авыр, бик авыр иде аның хәле. Кино бетүгә, ул, кызларга ияреп, урамга чыкты. Урамда инде караңгы, күктә чекерәешеп йолдызлар яна. Багана утлары яктысында авыл урамнары әллә нинди сихри тынлыкка төренеп утыра.

– Минем дә сезнең урамга барып киләсем бар ие, – диде Айрат, Нәзирәләр янына килеп.

– Бар соң! – Кызлар бер-берсенә карашып көлешеп алдылар. – Әллә сине безгә бәйләп куйдылармы?

Айрат, бөтен кыюлыгын җыйды да сөйләп китте:

– Безнең авыл бик матур. Фермалары да бар. Әле өч нәсел үгезен мәсекомбинатка җибәрделәр. Ә-әнә, тау башында сарык фермаларының уты яна, без анда малайлар белән тәкәгә атланып йөрибез.

Аның уйлавынча, болар авылдагы иң кызык хәлләр иде, ул кызларга карады һәм аларның бик бирелеп тыңлавын күргәч, сөенеп, тагын дәвам итте:

– Мәктәптә укыйбыз инде, коридорда футбол тибәбез. Ашауга карап инде… Хәбриев гел варутада тора. Ни… Шәһәр ничек анда? Гөрлиме? Их, бер барып күрәсе ие шуны…

– Шәһәрме? – Нәзирә, аптырап, иптәш кызына карады, аннан соң, күзләрен шаян ялтыратып, нидер исенә төшкәндәй, кызу-кызу сөйләп китте: – Шәһәр матур, зоопаркы да бар, әле менә бер маймыл качкан шуннан, дөрес булса, Каенлыда, диләр аны. Балконда биш сыер асрыйбыз… Ярый, сау булып тор, сарыкларыңа бездән сәлам әйт, яме!

Кызлардан аерылгач, Айратның кәефе күтәрелеп китте. «Яшәсен Марсель! – дип уйлады ул, сөенеп. – Их, күңелле дә соң кызлар озатуы!..»

Интернетта – Alf!

Компьютер серенә бик тиз төшенде Әлферит…

– Уау! – диде ул, интернет битләрен актарганда. – Әни, әни, дим, карале юри генә! Ниләр генә юк монда?!

– Җә, җә, кызышма! – Әнисе малаеның ай буе тарак күрмәгән чәчләрен тузгытты. – Интырныйтта утырганчы, дәресләреңне карар идең. Надан каласың бит! Нәселдә булмаганны… Бергә берне куша белмисең!

Әмма Әлферит әнисен ишетмәде. Башы-аягы белән компьютерга кереп чумган иде ул. Анда әнисе барында карарга ярамый торган әйберләр дә күп булып чыкты. Аларын малай кача-поса карады.

Көннәрдән бер көнне Әлферитнең күзе «чат» дигән язуга төште. Монысы өендә компьютеры булганнарның экран аша таныша, сөйләшә торган җире икән. Шул ук көнне «чат»та «Альф» дигән исем барлыкка килде, һәм Альф-Әлферит яшьтәшләре белән әңгәмә кора башлады.

Alf: привит рамашкы нихәль мин сине сагнып беттем.

Ромашка: Альф, минем хәлләр әйбәт. Сагынган кеше дустын кунакка чакыра ул.

Alf: уау әйдәбезга кунакка киль.

Ромашка: Бүген үкме?

Alf: канишны.

Ромашка: Әти-әниең ни дияр?

Alf: уау пахан белән мамань дачада.

Әйе, бүген гаять тә җаваплы көн. Ай буе компьютер аша ниләр турында гына сөйләшмәде Альф белән Ромашка! Ниһаять, Ромашка Әлферитләргә кунакка киләчәк!

Малай көзге каршына килеп чәчләрен тарады. «Айга бер булса да тарарга кирәк икән», – дип уйлады Әлферит. Борын астына зур ике бетчә чыккан булган – аларны сытты. Өйдә киеп йөри торган шортигын салып, «Найк» дип язылган спорт ыштанын киде.

«Ниндирәк икән син, Рамашкы?.. – Малай, хыялга бирелеп, күзләрен йомды. – Чәчең сары төстәме икән, карамы? Әллә арткы партада утыручы Гөлсемнеке төсле җирәнме?.. Синең дә битеңә бетчә чыгып интектерәме икән?..»

Әлферитнең хыялларын челпәрәмә китереп, ишектә кыңгырау чыңлады. Малай, пуля тизлегендә атылып, ишекне ачты һәм… лапылдап идәнгә утырды. Ишек төбендә, йөзенә битараф кыяфәт чыгарып, сыйныфташы Рәмилә басып тора иде!..

Кыз, үз өенә кергәндәй, вәкарь белән генә түргә узды, бүлмәгә күз йөгертеп чыкты һәм Әлферит каршына чүгәләде:

– Привет, Альфик! – диде ул, шаян елмаеп. – Ә беләсеңме, «Альф»ның син икәнен мин беренче көнне үк белдем бит.

– Каян белдең? – дип сорады тегесе, көч-хәл белән телен әйләндереп.

– Их, Альф, Альф! Бөтен дөньясында берәү генә бит син! Привет, кил сүзләрен дә яза белмәүче, конечно сүзен дүрт хата белән язучы, өтер, нокта, сорау билгеләренең нәрсә икәнен дә белмәүче бөтен планетада берәү генә бит син!.. Танымаска мөмкинме соң сине?!

Рәмилә малайга кызгану катыш үз итеп карап куйды һәм, сак кына иелеп, Әлферитнең ай саен тарак белән очрашырга җыенган пумала чәчләреннән сыйпады.

Компьютерда аралашу өчен дә белем кирәклеген Әлферит шул көнне аңлады. Гарьлегеннән җир тишегенә керергә дә әзер иде ул.

Исле сабын…
ясалма керфекләр…

Бер-беребезгә бүләк бирешү гадәте кайчан башланды соң әле? Ә-ә-ә… әйе, башлангыч сыйныфта укыганда ук. Икебез бер партада утыргангамы икән, 23 нче февраль һәм 8 нче Март җитүгә, без Гөлия белән бүләкләр алышабыз. Безнең мондый дуслыктан көнләшеп, бүтәннәр дә бер-берсенә бүләк бирешеп карады, ләкин аларның әлеге гадәте кыска гомерле булып чыкты. Ә менә безнеке…

Икенче сыйныфта укыганда, Гөлия миңа тарак белән кул яссуы кадәр көзге бүләк итте. Ә мин аңа… борын яулыгы! Ул чакта әле мин чәч тарауның ни икәнен белми идем. Күрәсең, чәчләрем кипкән пумала төсле тырпаеп торгандыр. Гөлия, үткер күз, шуны күреп алган! Ә инде ни өчен аңа борын яулыгы бүләк итүемне, шәт, үзегез дә аңлагансыздыр, артыгын әйтеп тормыйм.

Яхшы, ху-уш, өченче сыйныфта ниләр бүләк итештек соң әле?.. Әһә, искә төште! Ул миңа – исле сабын, ә мин аңа – теш щёткасы.

Үтерсәләр дә, дүртенче белән бишенчедә ниләр бүләк итешкәнебезне хәтерләмим. Әмма алтынчы сыйныфтагысы бик шәп истә калган. Ул елны мин Гөлиягә авызга сиптерә торган «Освежитель дыхания» бүләк иттем, ә ул миңа башына мамык чорналган шырпылар, ягъни колак чистарту җыелмасы китереп тоттырды.

Ә былтыр мондый хәл булды. Кыш урталарында Гөлиянең маңгаен бетчә басты. «Шәп булды әле, нәрсә бүләк итәсен беләм мин моңа быел» дип куанып йөргән мәлдә… менә бәла – маңгаемны гына түгел, битемне, муенымны, хәтта кулларымны… кыскасы, бөтен җиремне бетчә сырып алды. Беренче март көнне (без бүләкләрне икебез бер көндә бирешәбез) бетчәгә каршы кремны тантаналы рәвештә Гөлиянең бәләкәй учына төрткәндә, ул да нәкъ шундыйны (тик минекеннән өч тапкыр авыррак) сузды. Икебез бертавыштан көлеп җибәрдек.

Менә быел тагын бәйрәмнәр якынлаша инде. Кичә генә Гөлия белән шул хакта сөйләшеп утырдык.

– Бик күп әйбер бүләк итәсем килә сиңа, һәммәсен алырга акчам гына җитми, – мин әйтәм. – Шушы биш әйбер арасыннан иң кирәген үзең сайла…

Һәм кызга бәләкәй генә кәгазь кисәге суздым. Анда түбәндәгеләр бар иде:

1) ирен помадасы;

2) күз карандашы;

3) тырнак лагы;

4) ясалма керфекләр;

5) аякны тирләтми торган махсус крем.

Гөлия ясалма керфекләрне сайларга булды. Аннары сумкасына кереп китте. Актарына торгач, унсигез битле шакмаклы дәфтәр тартып чыгарды:

– Мин дә исемлек төзегән идем, – диде ул серле генә. – Әлегә бусыннан сайлый тор, тагын ике дәфтәр бар әле… Алары өйдә калган, иртәгә апкилермен…

Менә бит нинди әйбәт дус ул минем Гөлия!

Кыш бабай, бүләк давай!

Бишенче сыйныфта укыганда гашыйк булды Гариф Эльзага. Партадашының зур зәңгәр күзләренә сәгатьләр буе карап утырырга да риза иде ул. Яңа ел бәйрәменә бер ай кала алар арасында мондый сөйләшү булып алды:

– Эльза! Ә син Кыш бабайга ышанасыңмы?

– Белмим…

– Быел Кыш бабайдан бүләк сорадыңмы әле?

– Юк.

– Ник?

– Былтыр да сораган идем, бирмәде… – диде кыз, авыр сулап.

– Нәрсә сораган идең соң?

– Сөйләшә торган курчак. Сәлимәнеке төсле.

Әти-әнисе ашарга дип биргән акчаны тотмады Гариф, җыеп барды. Ә Яңа ел алдыннан, Эльзаның урамга чыгып китүен күзәтеп торды да, кыз яши торган фатирга килеп, кыңгырау төймәсенә басты.

– Әлфия апа, чыршы бизәдегезме әле? – дип, каушый-каушый гына сорады ул кызның әнисеннән.

– Бизәдек, үскәнем. Ник сорыйсың? – дип елмайды Әлфия апасы.

– Менә шушыны чыршы төбенә куегыз әле, – дип, Гариф куеныннан сөйләшә торган курчак тартып чыгарды. – Эльзага мин бирде димәгез, Кыш бабай китерде, диегез…

…Икенче көнне Эльза мәктәпкә кош тоткандай очып килеп керде:

– Гари-и-иф! – дип, бүләген өскә күтәрде ул. – Кыш бабай миңа курчак китергән! Ур-ра-а-а!

…Бер ел узып та китте. Эльза тагын да чибәрләнә төшкәндәй тоелды Гарифка. Яңа ел алдыннан алар арасында янә теге вакыттагы төслерәк сөйләшү булды:

– Эльза, ә син Кыш бабайга ышанасыңмы?

– Хәзер ышанам инде, – диде кыз, елмаеп.

– Быел нинди бүләк сорыйсың?

– Быелмы?.. – Кыз күзләрен шаян ялтыратып алды. – «Диор» дигән памады сорамакчы булам. Әнинеке төслене.

Монысын табу авыр булды Гарифка. Каршыларындагы кибеттә юк иде, абыйсына ияреп, шәһәрнең үзәгенә барып килергә туры килде. Һәм, билгеле инде, ай буе төшке ашны ашамый йөрергә… Ләкин тырышуларның нәтиҗәсе булды – ул елны Эльзаларның чыршысы төбендә «Диор» балкып ята иде.

«Һе, – дип башын кашыды малай. – Эльза чынлап та Кыш бабайның барлыгына ышана микәнни? Ел саен Кыш бабай итеп физрук Хәбир абыйны киендерүләрен белмиме ул?»

Тагын бер ел үтеп китте. Бу юлы Эльза Кыш бабайдан «Шанель» исемле хушбуй сорады. Кызның бу теләге дә тормышка ашты.