Молитва вторая
из службы

О священная главо, преподобне отче, преблаженне авво Герасиме, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Тропарь преподобному Герасиму, иже на Иордане, глас 4

Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Ин тропарь, глас 8

В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души вещи безсмертней. Темже и со ангелы срадуется, преподобне Герасиме, дух твой.

Кондак, глас 4

Возгоревся рачением горним, жесткость пустыни Иордановы паче всех мира сладких предпочел еси; отонудуже повинувся тебе зверь даже до смерти, отче, послушне и жалостне на гробе твоем скончася, прославльшу тя тако Богу, к Немуже моляся, и о нас, отче Герасиме, поминай.

Величание

Ублажаем тя, преподобне отче Герасиме, и чтим святую память твою, наставниче монахов и собеседниче Ангелов.

Преподобному Герасиму, иже на Иордане, молятся об укрощении диких зверей.

Молитвы благоверному князю Даниилу Московскому, чудотворцу

Молитва первая
из службы и акафиста

Церкве Христовы похвало высокая, града Москвы стено необоримая, державы Российския Божественное утверждение, преподобне княже Данииле. К раце мощей твоих притекающе, усердно молим тя: призри на нас, память твою воспевающих и с верою под кров молитв твоих прибегающих. Пролей теплое твое ходатайство ко Спасу всех, яко да утвердит миром страну нашу, грады и веси ея и обитель сию добре да сохранит, благочестие и любовь в людех твоих насаждая, злобу же, междоусобие и нравов развращение искореняя; всем же нам вся благая ко временному животу и вечному спасению даруй молитвами твоими, яко да прославляем дивнаго во святых Своих Христа Бога нашего во веки веков. Аминь.

Молитва вторая
из службы

О угодниче Божий, святый благоверный княже Данииле, сада Христова благовонный цвете, неба церковнаго кроткая звездо, земли нашея небесный уме, града Москвы и державы нашея мудрый здателю. Теплый к Богу молитвенниче, скорый в помощи, милостивый в нуждах, к тебе припадаем и тебе молимся: буди предстатель наш пред престолом Божией славы неусыпный. Собери нас друг ко другу, да печали ближняго своего кийждо любовию нелицемерною приобщается. Онебеси ум наш, да, иго тяжкое земных попечений отвергше, бремя легкое Христова Евангелия возлюбим. Открый очи наши, да узрим нетленную красоту Господню и да не отчуждени будем жизни Божией. Тихость Духа Божия да соблюдет сердце наше. Весна покаяния да украсит дела наша.

Княже милостивый и щедрый, сохрани страну нашу, град твой и зде молящихся тебе от всякия напасти, от враг видимых и невидимых, от губительства и глада, от междоусобныя распри и внезапныя смерти. Отверзи нам двери милосердия Божия и избави нас от всякаго зла. Под крепкий покров благостыни твоея прибегающе, молим: буди нам тихое пристанище в скорбех. Остени нас молитвами твоими. Соблюди нас от падений греховных и заблуждений, да сердцем сокрушенным, духом смиренным в печали и радости выну зовем: Господи, предстательством преподобнаго Твоего помилуй нас. Аминь.

Молитва третья,
чтомая в Московском Данилове монастыре

О преизящный и предивный чудотворче российския земли, преблаженне и приснославне княже Данииле, скорый помощниче и теплый в бедах заступниче, спасаяй нас, наследие твое, от всяких бед молитвами твоими! Тебе вси людие твои просим и молимся, и надежду на тя имуще, почитаем и прославляем тя, и твое великое о нас ко Господу предстательство величаем: таже исповедуем тебе быти изобильнаго чудес источника, скораго православным заступника, алчущим питателя, убогим благодетеля, вдов и сирот предстателя и заступника, нищих неоскудеваемаго богатителя, болящих врача непостыднаго, скорбящих утешителя и всем с верою тя призывающим крепкаго помощника. Убо и нам прибегающим под кров твой и молящимся тебе помози: вемы бо, воистину вемы, яко много может молитва праведнаго поспешествуема во благое. Тебе же праведнаго предстателя имуще и ко твоему теплому ходатайству и заступлению смиренно притекающе, умильно просим тя: о преизрядный угодниче Христов, всехвальне княже Данииле! Многомощными твоими молитвами исходатайствуй здравие и спасение всем христианом. Даруй им невидимым твоим предстательством на супостаты победу, и тишину во днех их подаждь, царство же их миром огради: царствующий же град, тобою основанный и тобою созданный, и вся люди твоя молитвами твоими невредимы сохрани, и святую обитель сию добре утверди, юже сам воградил еси, и в ней подвиг добрый совершив, многоцелебныя твоя мощи по смерти оставил еси, и во всем сию богоугодну покажи. Услыши и нас молящихся тебе, и яви предстательство твое о нас к Вышнему, и помози нам, блаженне, во еже избавитися нам и невредимыми быти от всяких прилогов диавольских, и Небеснаго Царствия молитвами твоими наследие улучити, да с тобою купно прославим прославльшаго тя и давшаго тебе чудес исцеления благодать, Господа нашего Иисуса Христа: Емуже подобает всякая слава, честь и поклонение, со Безначальным Его Отцем, и Пресвятым и Животворящим Его Духом, ныне и присно и во веки веков. Аминь.

Молитва четвертая
из акафиста

О преподобне Данииле, к иконе твоей притекающе, усердно молим тя: призри на нас (имена), с верою под кров молитв твоих прибегающих. Пролей теплое твое ходатайство ко Спасу всех, яко да утвердит миром приход сей и храм сей добре да сохранит, благочестие и любовь в людех православных насаждая, злобу же, междоусобие и нравов развращение искореняя; всем же нам вся благая ко временному животу и вечному спасению даруй молитвами твоими, яко да прославляем дивнаго во святых Своих Христа Бога нашего вкупе со Отцем и Святым Духом во веки веков. Аминь.

Тропарь благоверному князю Даниилу Московскому, глас 4

Княжения твоего славу отложив, озаряемый Божественною благодатию, Богомудре княже Данииле, весь разум в сердце от суетнаго мира сего к Зиждителю неуклонно возложил еси, и яко звезда на востоце Российскаго государства просиял еси, целомудрием же и равноангельным твоим житием течение добре совершая, веру соблюл еси непорочну. Тем и по смерти прослави тя Бог в чудесех, яко источаеши исцеления верно притекающим к честней раце твоей; сего ради днесь празднуем успение твое людие твои. Ты же, яко имаши дерзновение ко Христу, моли спасти отечество твое, и мирней быти державе наследия твоего.

Ин тропарь, глас 5

Благодатнородный сын Твой, Всетворителю Господи Боже наш, щедрототворством христоподражательный отец Даниил, в евангельском заповедании и благоразумном своем житии чудесодарования и Небесная со святыми пребывания восприят от Тебе, Спасителя нашего Христа Иисуса. Возымев бо Твое Божественное пособие, суетномирския и плотоогненныя страсти упразни и враги демоны, невидимыя и видимыя злотворцы и разорители своего великокняжескаго наследия, победи. Того молитвами спаси вся, зовущия Тебе: Аллилуиа.

Ин тропарь, глас тойже

Благославная похвало и благосветлый венче царствующаго града Москвы, всеблаженне Данииле, отче наш. Подвигом бо добрым подвизався, богоугодное течение совершил еси, всерадостныя нескончаемыя жизни сподоблься, зриши Господа Бога, Емуже молися, благочествующим тя и лобызающим богохранимыя твоя и чудесоточныя мощи, спасение и наследие Царства Небеснаго даровати.

Ин тропарь, на обретение мощей, глас 3

Явился еси в стране нашей, яко звезда пресветлая, благоверный Данииле, лучами света твоего озаряя град твой и обитель твою, людем православным поборник еси, пленным свободитель и нищим защититель, моли Христа Бога державе Российстей даровати мир и спасти души наша.

Кондак, глас 4

Избранный Богом от чресл родительских и воспитанный от младенчества в законе Господни в мужа совершенна и промыслом Вышняго, именитаго града Москвы наследие княжества прием, верен строитель благочестивым людем твоим показался еси, Богоблаженне Данииле, ихже образом своим наставляя и поучая заповедем Господним выну, путем, ведущим в живот вечный, присно шествуя, Небеснаго Царства достигл еси, идеже со ангельскими водворяяся лики, поеши Богу: Аллилуиа.

Ин кондак, глас 8

Яко Богонасажденное и Богоразумное древо в России возрасл еси и многоплодием Богоподобных добродетелей твоих утучняеши серца благочестивых. Темже в крепости помощи твоея, преблаженне Данииле, от всяких нас бед свободи, да поем присно: Аллилуиа.

Ин кондак, на обретение мощей, глас 6

Еже по образу соблюд непреложно, и яже в мире тленная оставив, со ангельскими лики предстоиши Христу, преподобне Данииле, никакоже забывая чад твоих, но милостивно посещая и глаголя им: аз есмь с вами и никтоже на вы.

Ин кондак, глас 8

Красоту мира сего, княжение и славу яко временная помышляя, и сего ради благочестно в мире пожил еси, блаженне Данииле, милостию и молитвами, и иночеством Богу угодив, и по преставлении своем чудес дар приим от Христа Бога, и светильник явися пресветлый, просвещая своими чудесы, приходящим с верою подаеши скорое здравие и от бед избавляеши. Темже Христова Церковь песньми славит тя, благочестивый княже Данииле, царствующему твоему граду Москве великое утверждение.

Величание

Ублажаем тя, преподобне отче наш княже Данииле, и чтим святую память твою, ты бо молиши за нас Христа Бога нашего.

Молитвы благоверному великому князю Георгию (Юрию) Всеволодовичу Владимирскому

Молитва первая
из акафиста